12星座愛情觀！

唔分男女的白羊人都係爆炸力驚人兼自信心極強，一旦出現目標，就會一個頭裁落去，唔成功唔心息，甚至乎玉石俱焚都在所不惜！連響戀愛上的處理方式亦都一樣，一旦有鍾意的對象，就會主動出擊，並且認為世上冇追唔到的男仔或者女仔！不過同時亦會不斷追求唔同的戀愛感覺！

用「細水長流」同「戀一世的愛」形容金牛人的戀愛觀就最合適，金牛人本身性格都係傾向穩陣派，冇乜野心，最緊要愉快同埋要好好享受生活；談戀愛亦都貫徹佢呢個座右銘，搵對象最緊要簡單同穩陣！另一點重要的係要飲水亦要麵包，無論男女金牛都希望唔需要擔心埋另一半的經濟狀況！

係人都知雙子座出晒名雙重性格兼神經質，談戀愛時佢亦都係咁，對住朋友時鬼鬼馬馬牙尖咀利，殊不知對住另一半時不滿說話同投訴說話多過講肉麻說話，而且佢d神經質會毫不掩飾咁展現響另一半面前！最重要係記得永遠要畀到新鮮感佢，因為對雙子人來講戀愛係絕對有有效日期！

蟹仔的性格同佢的外形真係好似，佢個硬殼同大鉗係用來保護佢脆弱甜美的蟹肉，唔論咩年紀又或者男定女，唔同的巨蟹人都係非常咁講求安全感，連談戀愛亦都係咁，就算巨蟹人感情係幾咁澎湃，有幾感性都好，一旦講到搵對象佢都會步步為營，戀愛係尋找終身伴侶同加添家庭成員的一環！

無論本身的條件係點，有錢定冇錢；生得靚唔靚，身為獅子座人都會不約而同追求一個絢爛有趣味的人生，最好能夠做到人生如戲！當然連佢的戀愛觀亦都一樣，要絕對多姿多采，最好就係公主配王子，皇帝配皇后，仲有要浪漫兼轟烈，例如有錢千金同窮小子私奔，又或者姐弟戀呀！

處女座天生最擅長分析，細心務實，要求高而且做事按步就班；連談戀愛都離唔開呢d大原則，對佢來講拍拖結婚生仔都係一個投資項目，未買入前就梗係要細心揀下，佢唔鍾意買d花巧粉飾股，反而注重實用同業績，精明的佢好少入錯股，不過一旦真係入錯佢都會盡量繼續持有！

故名思義，天秤座為人就係好似佢個秤咁，好講保持平衡：生活的平衡、心靈的平衡、同其他人之間相處的平衡，所以連談情說愛都係一樣，佢同另一半都係放響個秤度，冇對象會令個秤失去平衡，而且大家的比重都係咁大，所以天秤人本身既係戀愛動物，仲係非常黐住另一半！

基本上話天蠍座係最神神秘秘的星座都實冇錯！佢一向都鍾意將自己d事收收埋埋，但又鬼死咁熱衷八卦其他人的秘密喎！而佢的戀愛觀亦都係咁，唔鍾意向其他人講咁多，就算係對住情人都唔係太鍾意表達自己，但係又鬼咁鍾意去管住情人喎！不過佢對愛情的投入又確係百分百！

人馬座天生自由奔放，肉體喜歡四圍旅遊冒險，其實原因都希望可以因為咁而令精神得到更大的提升！亦可能因為咁令到佢的戀愛觀都非常近似，談戀愛都要好似一場遊戲咁精彩好玩，追求精神上的滿足比肉體上的滿足更重要，所以佢會用心盡力談戀愛，但係千祈咪同佢講責任喎！

支配星土星影響到山羊人非常傳統保守兼且仲好有責任感，連帶佢響戀愛方面的表現都係咁，對佢來講戀愛係人生的必需品，個個人拍拖結婚佢都會跟傳統結婚生仔，佢追求的愛情係穩陣同責任感，千祈咪攪咁多刺激同煩惱過佢，佢唔係咁受得了，佢只係要一段平靜安穩的關係！

大部分的水瓶人都係博愛主義者，佢唔會只係局限於錫家人同情人，佢更加關心朋友同陌生人，千祈咪誤會佢會好似山羊座人咁唔注重戀愛喎，其實只係用平實的態度去談戀愛，佢會認為戀愛係等同搵到一個可以同佢分享喜怒哀樂任何一切的伙伴，而唔係要一個剝奪佢時間的人！

唔理男女的雙魚座都畀人一種不食人間煙火，糊里糊塗的感覺，對人好易付出，又有愛心，響戀愛方面的表現就更甚，戀愛對佢來講係人生的一切，包括情感、生活仲有係銀行提款戶口，其實雙魚座的愛情觀同處女座有d似，都係現實派，不過唔同的係雙魚人較傾向採包容方式而唔係控制方式！